Ask ony teacher the noo aboot how thir getting oan at wirk and they’ll aw say the same hing tae ye - “Only twa weeks tae go!” They’ll say it bricht enough, wae a wee smile an a wink an that, but ye can see whit thir really hinking - only twa mair weeks tae survive. Twa mair weeks til ah kin sit aboot in my jammies eating choacolate an hae a Baileys at 10 in the morning an no hae tae answer tae anyboady. Pure bliss.
Teachers in December are aw aboot survivin’ ye see. The coontdoon is well an truly oan. It’s aw thae can talk aboot, hink aboot. Teachers gettin’ through December is like yon Bear Grylls fella gettin’ through the jungle; ye dae whitever ye huv tae tae survive.
December’s a scunnerin time in a school. Thir’s weans everywhere fur a stert, and every wan ae them is gettin’ mair and mair excitit aboot whit’s tae come. The usual routines stert tae gawn oot the windae as stages go up an tinsel appears aboot the place, and God help ye aw when the Christmas tree goes up - cos the weans jist aboot explode.
‘Hold Baby Jesus gently!’ 4 things you hear in every primary school in December
Tis the season: 8 reasons why teachers know Christmas is coming
Festive films: 7 Christmas movies to entertain and educate pupils
WATCH: ‘Be the nice kid’ this Christmas
Ye ken yon days when it’s blawin’ a hoolie ootside during a fu’ moon and ye huv tae scrape the weans aff the ceilin’? December’s like that. Except it lasts aw month lang. Tryin’ tae actually teach anyboady anything gets gey near impoassible. No that thir’s much time fir teaching onyways, whit wae aw the nativity practices an the Christmas crafts an the perties tae get seen tae. It’s aw go. An it’s aw coverit in glitter. Nae wunner teachers are knackered an crabbit.
Fir aw that but, teachers are fair lucky, ye ken. Bein’ aroon weans at Christmas time. Haein the chance tae mak Christmas special fir them. Giein’ them guid memories that’ll last a lifetime, stretchin’ intae when thae hae weans o’ thir ane. Well worth bein’ knackered fir.
Jist dinnae get in atween a teacher an thir weel-deserved Baileys when the coontdoon’s finally ower.
