Pennaeth

Pennaeth - Ysgol Caer Elen
Job reference: REQAA2086

Job description

Mae Llywodraethwyr Ysgol Caer Elen am benodi pennaeth blaengar, dynamig ac ysbrydoledig i arwain a datblygu ymhellach yr addysg Gymraeg a ddarperir i ddisgyblion 3 i 16 oed, gan sicrhau cyfleoedd dysgu a phrofiadau eithriadol o’r radd uchaf i’r myfyrwyr i gyd. Mae hyn yn gyfle i ddatblygu ac arwain ysgol unigryw ac arloesol o ran addysg Gymraeg yn yr ardal.

Mae’r Corff Llywodraethol yn awyddus i benodi Pennaeth -

• A fydd yn datblygu, hyrwyddo a gweithredu gweledigaeth gadarn ar gyfer datblygiad yr ysgol mewn partneriaeth â'r disgyblion, staff, y llywodraethwyr, y rhieni, y gymuned ehangach a'r awdurdod lleol;
• Sy'n rheolwr ac yn arweinydd arloesol a deallus, yn meddu ar y profiad i ddatblygu a chefnogi staff, rheoli cyllideb a gweithio gyda chorff llywodraethu;
• Sy’n gallu cynllunio'n strategol i sicrhau gwelliant parhaus a dilyniant dysgu ar draws ystod oed yr ysgol, gyda ffocws clir ar wella deilliannau a lles disgyblion gan gyrraedd rhagoriaeth
• Yn gyfathrebwr rhagorol sy'n gallu herio, ysbrydoli ac ysgogi eraill i ddysgu a chyflawni
• Fydd yn llysgenad i hyrwyddo diwylliant Cymru a'r Gymraeg;
• Sy’n angerddol ynghylch meithrin y partneriaethau rhwng disgyblion, rhieni, staff, llywodraethwyr, ysgolion a'r gymuned ehangach

 

Sefydlwyd Ysgol Caer Elen fel ysgol pob oed 3-16 Cyfrwng Cymraeg cyntaf Sir Benfro yn 2018, i gwrdd a’r galw cynyddol am addysg Gymraeg yng nghanol a de Sir Benfro. Ar hyn o bryd, darperir addysg i ddisgyblion hyd at flwyddyn 9, a disgwylir i’r ysgol gyrraedd ei llawn dwf dros y blynyddoedd nesaf gan gyrraedd oddeutu mil o ddisgyblion.

Mae hwn yn gyfle cyffrous i sicrhau bod yr ysgol yn parhau i fynd o nerth i nerth, gan wneud y gorau o’r adnoddau a’r cyfleusterau newydd sydd o’r radd flaenaf. Rydym yn awyddus i benodi pennaeth a fydd yn arwain yr ysgol at ragoriaeth ym mhob agwedd o’i darpariaeth.

Mae gan yr ysgol dîm o staff brwdfrydig, teyrngar, talentog ac ymroddedig, ac mae iddi natur deuluol, gyda chefnogaeth dda oddi wrth y rhieni a’r gymuned. Mae’r llywodraethwyr a’r staff yn argyhoeddedig bod lles a llwyddiant pob plentyn yn ganolog i ethos hapus Ysgol Caer Elen. Bydd y pennaeth newydd yn cael cefnogaeth gadarn gan y corff llywodraethol.

Bydd yn rhaid i unrhyw ymgeisydd nad yw'n bennaeth ar hyn o bryd feddu ar gymhwyster CPCP ar yr adeg benodi.

Mae Diogelu ac Amddiffyn Plant yn flaenoriaethau allweddol i Wasanaeth Addysg a Phlant Sir Benfro. Rydym yn anelu at gefnogi plant a phobl ifanc bregus i sicrhau eu bod mor ddiogel ag y gallant fod. Mae ein hysgolion wedi ymrwymo i sicrhau bod plant yn cael eu gwarchod a'u hamddiffyn ac fe fyddant yn cymryd camau i sicrhau eu lles ac yn cydnabod bod gan blant yr hawl i gael eu diogelu. Mae ethos cyffredinol yr holl ysgolion yn cefnogi hyn.

Mae'r swydd hon yn amodol ar Ddatgeliad Manwl (rhestr plant) gan y Gwasanaeth Datgelu a Gwahardd.

Amrediad Cyflog: L 21– L 27
Dyddiad dechrau: Ionawr 1af neu cyn gynted â phosib wedi hynny

Gofynnwn i bob ymgeisydd gyflwyno ceisiadau ar-lein. Os na fyddwch yn gallu gwneud hyn, cysylltwch â’r Gweinyddwr Recriwtio cyn gynted â phosibl trwy e-bost i recruit@pembrokeshire.gov.uk.
 
Yn ychwanegol at hyn, os bydd gennych unrhyw anghenion pellach neu os bydd arnoch angen unrhyw gymorth ychwanegol yn ystod y broses recriwtio, cysylltwch â ni trwy anfon neges e-bost i recruit@pembrokeshire.gov.uk
 
Os ydych eisoes yn ddefnyddiwr, gwnewch yn siwr eich bod wedi mewngofnodi i'ch cyfrif cyn dechrau ffurflen gais.

Ni fydd unrhyw geisiadau sy’n cael eu cyflwyno trwy gyfrwng y Gymraeg yn cael eu trin yn llai ffafriol na cheisiadau sy’n cael eu cyflwyno trwy gyfrwng y Saesneg.

Mae’r gallu i siarad Cymraeg yn rhugl yn hanfodol ar gyfer y swydd yma.

Rydym yn disgwyl tynnu’r rhestr fer a chynnal cyfweliadau fel a ganlyn ond fe all hyn newid:

Dyddiad cau: Hydref 12fed 2020 (ganol nos)

Rhestr fer: Hydref 14eg 2020

Ymweld â’r ysgol: Tachwedd 3ydd 2020 (gwahoddir ymgeiswyr ar y rhestr fer i ymweld os mae amodau’n caniatau)

Cyfweliad Diwrnod 1: Tachwedd 3ydd 2020 yn Ysgol Caer Elen

Cyfweliad Diwrnod 2: Tachwedd 4ydd yn Ysgol Caer Elen